Kuwafanya Wagonjwa Kuwa Wanafunzi

(1 Yohana 3, Marko 2, Kumbukumbu la Torati 28, Luka 9)

Somo hili limetafsiriwa kutoka katika Copr. 2011, Bruce N. Cameron, J.D. Marejeo yote ya maandiko yametoka kwenye tafsiri ya New International Version (NIV), copr. 1973, 1978, 1984 International Bible Society, isipokuwa kama itaelezwa vinginevyo. Nukuu kutoka kwenye tafsiri ya Biblia ya NIV inatumika kwa ruhusa ya Wachapishaji wa Biblia wa Zondervan. Majibu yaliyopendekezwa yanapatikana kwenye parandesi (kwenye mabano). Somo limekaa kimtazamo kwamba mwalimu anatumia ubao au sehemu nyingine yoyote ambayo inaweza kuonekana na wanafunzi. Kama huwa una kawaida ya kupokea somo hili kwa njia ya barua pepe na hukulipata kwa juma moja, unaweza kulipata kwa kubofya kwenye www.lesoni.blogspot.com kwa lugha ya Kiswahili na http://www.GoBible.org kwa lugha ya Kiingereza pamoja na lugha nyingine kama vile Kifaransa, Kijerumani. Omba kwa ajili ya uongozi wa Roho Mtakatifu unapojifunza.

Utangulizi: Je, ungependa washiriki waongezeke zaidi kanisani kwako? Huo ndio mjadala unaoendelea kanisani kwangu hivi sasa! Watu wana mawazo ya kufanya utandaaji, lakini mimi wazo langu ni kwamba “Hebu tufanye juhudi za kuwaponya wagonjwa!” Je, umewahi kufikiria kwamba hiyo ni njia nzuri ya kuwaleta washiriki wapya kanisani kwako? Hiyo ndio njia aliyoitumia Yesu, si ndio? Au, je, alitumia njia gani? Je, Yesu aliwaponya watu ili ayavute makundi makubwa ya watu kumsikiliza, au aliwaponya watu kwa sababu aliwahurumia? Endapo unawaponya watu ili kuwavutia watu wengine kuisikiliza injili, je, huko sio kuonesha huruma? Hebu tuzame kwenye somo letu la Biblia ili tuone kile tunachoweza kujifunza juu ya kukabiliana na ugonjwa!

I.                   Mioyo na Uponyaji

A.                Soma 1 Yohana 3:16-18. Wangapi kati yenu wanapendelea kuonesha upendo kwa maneno? (Kwa sababu gharama yake ni ndogo, hutumia muda mfupi, na kuna maumivu kidogo!)

1.                  Je, Biblia inatuasa kuwa tuonesheje upendo? (“Kwa matendo na kweli.”)

a.                   Je, kauli ya “kwa kweli” inamaanisha nini katika huu muktadha? (Inamaanisha kwamba kutenda jambo fulani kunafanya matendo yako ya upendo yawe ya kuaminika.)

B.                 Soma 1 Yohana 3:19-20. Je, inamaanisha nini kwa “mioyo yetu kutuhukumu?” (Inamaanisha kujisikia hatia.)

1.                  Je, Biblia inatuambia nini katika haya mafungu tuliyojifunza? (Tunatakiwa kuonesha upendo si kwa maneno tu. Tutajisikia vizuri kwa kuwasaidia watu walio wahitaji.)

C.                 Je, mafungu haya yanaashiria nini kwenye maswali niliyoyauliza kwenye utangulizi? Endapo tunaweza kufanya uponyaji kuwa sehemu ya uinjilisti kwa njia ya utandaaji, je tunapaswa kufanya hivyo? (Ndiyo! Bila kujali kama unafanya uponyaji ili kuvutia makundi ya watu kuisikiliza injili, au unawaponya wale ambao tayari wameshavutiwa na injili, unaonesha kujihusisha kwako kwenye pande zote mbili za wahusika – hali ya kiroho na ya kimwili.)

D.                Soma 1 Yohana 3:21-22. Je, umeuona uponyaji kanisani kwako?

1.                  Kama hujauona, je, fungu hili linaashiria nini? (Kwamba tunaweza kuuomba uponyaji.)

2.                  Je, ahadi hii ina masharti yoyote? (Inasema kuwa tunaweza kupokea jambo lolote tuliombalo endapo tunamtii Mungu.)

E.                 Soma 1 Yohana 3:23. Je, tunazungumzia utii wa aina gani? (Kumwamini Yesu na kuwapenda watu wengine. Hii inaashiria kuwa tunatakiwa kuyapa kipaumbele maombi kwa ajili ya uponyaji (kumwamini Mungu) kwa niaba ya watu maalum (kuwapenda wengine).)

F.                  Soma 1 Yohana 3:24. Je, tunakaaje ndani ya Yesu na Yesu anakaaje ndani yetu? (Hii ni rejea mahsusi ya Roho Mtakatifu kukaa ndani yetu na sisi kuishi maisha yanayoendana na matakwa ya Roho Mtakatifu. Hili ni jambo la muhimu sana.)

G.                Hebu tuwe wakweli kabisa kwa dakika chache. Jambo gani linafanya kuwasaidia watu wengine liwe na maumivu? Hivi punde tu nimesema kuwa kuwasaidia watu wengine kunatufanya tujisikie vizuri. Je, ni yote mawili?

1.                  Je, unaweza kubainisha nyakati ambazo ulijisikia vizuri kuwasaidia watu wengine na nyakati ambazo ulijisikia vibaya? Je, jambo gani linaleta utofauti? (Kutatua tatizo kwa mtu mwenye shukrani kunafanya mtatuzi wa tatizo ajisikie vizuri. Tatizo la kudumu lisilotatulika linalomhusisha mtu asiye na shukrani huleta maumivu/hukatisha tamaa kwa mtatuzi wa tatizo.)

2.                  Je, Yesu alishughulikaje na matatizo ya watu waliomwendea? (Alitatua matatizo yao mara moja. Hebu tuangalie mfano katika sehemu inayofuata.)

II.                Yesu na Uponyaji

A.                Soma Marko 2:1-3. Je, watu wanakuja kwa ajili ya kusikiliza neno au kwa ajili ya uponyaji? (Yote mawili. Lakini inaonekana kama vile watu wengi zaidi wanakuja kwa ajili ya kusikiliza maneno ya Yesu.)

B.                 Soma Marko 2:4. Endapo ungekuwa unazungumza na makutano, je, ungependa kumwona mtu akitoboa dari kwenye mahali ambapo unazungumza na watu?

1.                  Je, ungependa kuona mtu akishushwa kupitia katikati ya watu? (Litakuwa jambo la kuvuruga usikivu wa watu.)

C.                 Soma Marko 2:5. Je, Yesu anarejea imani ya nani? (Inaonekana kama anarejea imani ya kundi la watu waliomshusha, na sio tu imani ya yule mgonjwa, kwa kuwa kauli ya Yesu inasema, “imani yao.”)

1.                  Jiweke kwenye nafasi ya mmojawapo wa wale wasaidizi wanne. Je, Yesu anasema maneno ambayo ulikuwa unatarajia kuyasikia? (Hapana! Mwenzangu amepooza. Nisingekuwa na haja ya kumpitishia darini na kumshusha hadi chini kwa ajili ya kusamehewa dhambi. Ninataka Yesu amponye.)

a.                   Je, inawezekana kwamba Yesu anazungumzia dhambi ya kuingilia wasilisho/mazungumzo yake?

D.                Soma Yohana 9:1-3. Je, swali la wanafunzi linafunua nini juu ya fikra za watu kuhusu dhambi na ugonjwa? (Mambo yote mawili yanahusiana.)

1.                  Je,Yesu anafanya hitimisho juu ya hii imani maarufu? (Anafanya hivyo kwenye hili suala pekee. Hajibu kuwa, “Mnasema nini, hivi mmekuwa wendawazimu?” Badala yake, anasema kuwa hapa si dhambi za wazazi wala za mtoto zilizochangia kwenye tatizo.)

2.                  Je, unafikiria nini juu ya sababu aliyoitoa Yesu?

a.                   Kumbuka kisa cha Ayubu na marafiki wake? Marafiki wa Ayubu walimwambia Ayubu kuwa alikuwa akiteseka kwa sababu ya dhambi zake. Je, jibu analolitoa Yesu kuhusu mtu kipofu linahusika kwenye muktadha wa Ayubu? (Ndiyo!)

E.                 Hebu turejee kwenye kisa chetu juu ya mtu aliyepitishiwa darini. Soma Marko 2:6-8. Je, waandishi wako sahihi? (Ndiyo, Mungu ndiye anayesamehe dhambi.)

1.                  Kama waandishi wako sahihi, kwa nini Yesu anawauliza? (Kwa sababu hili ni suala tata kwa miaka mingi – je, Yesu ni Mungu?

F.                  Soma Marko 2:9-12. Hebu tupitie maswali tuliyoyaibua hapo awali. Kwa nini Yesu alitenda huu uponyaji? (Inaonekana sababu kubwa ni kuthibitisha kuwa yeye ni Mungu.)

1.                  Endapo tutamwomba Roho Mtakatifu awaponye watu ili tuweze kuwaleta watu kanisani, je, hiyo itakuwa sababu thabiti? (Tunataka kuwaongoa watu ili watambue kwamba Yesu ni Mungu.)

2.                  Je, ni sababu gani nyingine zinazoashiriwa kwa huu uponyaji? (Angalia tena Marko 2:5. Yesu alihamasishwa na imani yao.)

a.                   Je, jambo hili linatufundisha nini kuhusu mpango wa kutumia uponyaji ili kuiendeleza injili? (Tunatakiwa kuwa na imani. tunatakiwa kuiombea.)

b.                  Kutokana na kisa hiki, unadhani tunaweza kufanya hivi kanisani kwetu? Je, tungeweza kufanya uponyaji endapo tungekuwa na uwezo wa Roho Mtakatifu? (Fikra ya kawaida inaweza kuwa ni mtego. Angalia njia ya marafiki isiyo ya kawaida. Hawakumwambia rafiki wao, “Hatuwezi kufanya hivi leo, watu ni wengi sana.” Badala yake, mmoja wao alipendekeza, “Hebu tupande darini na tutoboe tundu analoweza kupita mtu ili tuweze kuingilia wasilisho la Yesu kwa kukuweka mbele yake. Nadhani Yesu atatupatia thawabu kwa jambo hili!” Hiyo ni imani, sio mantiki.)

G.                Soma Kumbukumbu la Torati 28:15 na Kumbukumbu la Torati 28:20-22. Je, watu walikuwa sahihi kufikiria kwamba kuna uhusiano kati ya dhambi na ugonjwa? (Ndiyo, kabisa. Ninaona angalao sababu tatu kuu za ugonjwa: a) Tunaishi kwenye dunia yenye dhambi; b) Kushindwa kwetu wenyewe; na, c) Kumpa Mungu utukufu. Mara nyingine sababu zote tatu zinaonekana kuhusika.)

III.             Uponyaji na Utandaaji

A.                Soma Luka 9:1-2. Kama kuna uhusiano kati ya dhambi na ugonjwa, je, “tunawaponya” watu kwa kuwaongoa? (Ndiyo!)

1.                  Je, hii ndio njia ya kuliendeleza kanisa? (Tunaonesha ubunifu wa fikra tunapoliendeleza kanisa kwa kusema kuwa endapo unamfuata Yesu utakuwa mwenye afya njema, na maisha yako yatakuwa bora.)

B.                 Mojawapo ya mambo mazuri kuhusu mimi kufundisha katika Chuo Kikuu cha Regent ni kwamba walimu na wanafunzi wengi ni sehemu ya kile ninachokiita Ukristo wa “Utakatifu wa Kipentekoste.” Hawa ni Wakristo wanaochukulia suala la utii kwa Mungu na uwezo wa Roho Mtakatifu kwa umakini sana. Utagundua kwamba Luka 9:1 inawazungumzia wanafunzi “Kumi na Wawili.” Je, uponyaji ulitengwa kwa ajili yao au katika kipindi chao? (Soma Yohana 14:12-14. Fungu hili linasema kuwa “mambo makubwa” yanawezekana kwa “yeyote aniaminiye.” Katika mafungu machache yanayofuatia (Yohana 14:16-17) Yesu anaahidi kutupatia Roho Mtakatifu ili akae pamoja nasi. Uponyaji unawezekana kwa njia ya uwezo wa Roho Mtakatifu.)

C.                 Soma 1 Wakorintho 12:8-9. Je, hii inatufundisha nini? (Mambo mawili. Uponyaji ni karama ya Roho. Pili, Mungu ni mkuu (mwenye enzi). Anaamua ampatie nani karama na nani aponywe.)

D.                Soma Ufunuo 21:3-4. Je, hatma ya ahadi ya uponyaji ni ipi? (Wale watakaookolewa wataishi kwenye dunia itakayofanywa upya, mahali ambapo kifo, maumivu na ugonjwa vitakuwa ni mambo ya zamani. Sifa kwa Mungu!)

E.                 Rafiki, Mungu anaweza kukupatia karama ya Roho wa uponyaji, lakini hata kama hakukupatia, unao uwezo wa kuwaambia watu wengine habari za Yesu. Uhusiano na Yesu unatusaidia kuepuka kujiletea ugonjwa na unatupatia ahadi ya kuwa na dunia isiyo na dhambi na ugonjwa. Kwa nini usishiriki habari hizi na watu wengine leo?