History

HISTORIA YA CASFETA

UTANGULIZI

 

CASFETA ni Jumuiya ya wanafunzi mabalozi wa Kristo Tanzania, kama jumuiya CASFETA imekuwa na malengo tangu kuanzishwa kwake. CASFETA ni hitaji la wanafunzi walioko mashuleni na vyuoni kumuabudu Mungu kulingana na imani ya kipentekoste. CASFETA imekuwa na malengo ya kuwaunganisha wanafunzi wote wenye imani ya kipentekoste mashuleni mwetu na pia kuwaleta kwa Yesu wanafunzi wasiookoka.

Kupitia CASFETA wanafunzi wanwezeshwa kumtumikia Mungu wawapo mashuleni, hii ni kutimiza wajibu wetu kama wakristo na pia kuwa na fursa ya kutumia vipawa ambavyo Bwana ameviweka ndani ya wanafunzi katika utumishi katika nchi yetu ngazi ya shule na vyuo na mwisho katika ujenzi wa Taifa letu.

Kupitia CASFETA wanafunzi waliookoka mashuleni wanawajibu wa kupiga vita matendo yote maovu yanayoharibu jamii kama vile ulevi, utumiaji wa madawa ya kulevya, maambukizi ya magonjwa ya zinaa kama vile UKIMWI.

Mkazo katika masomo ni jukumu la kila mwana CASFETA awapo shuleni au chuoni alimradi utumishi wetu uweze kuthibitishwa. Wana CASFETA wana wajibu wa kusaidiana kimasomo kila inapobidi ilikuweza kutimiza malengo ya kumtumikia Mungu shuleni au chuoni.

CASFETA ni chombo ambacho kinaandaa watumishi wazuri wa sasa na wa siku za usoni kwa hiyo ni wajibu wa kila mpentekoste hasa wale waliookoka mashuleni na vyuoni kuhakikisha kuwa chombo hiki kinalindwa , kinatunzwa na kinaelezwa ilikuweza kutimiza makusudi yake sawa na mpango wa Mungu katika nchi yetu, pia na kwa wale wasio mashuleni wanawajibu wa kukipeleka chombo hiki katika sehemu ambazo bado hakijafika.

Kwa kuwa shule na vyuo vinaongezeka katika nchi yetu,kila mwaka tunakila sababu ya kumshukuru Mungu kwa hilo na kuwajibika kupeleka CASFETA katika shule hizo na vyuo hivyo.

Namna ambavyo CASFETA inaweza kuanzishwa katika shule au chuo ambapo hakuna huduma hii ni kama ifuatavyo;-

Endapo kuna wanafunzi wa kipentekoste katika shule au chuo na hitaji lipo la kuwa na CASFETA katika chuo au shule husika mawasiliano yafanywe kati ya wanafunzi na uongozi wa CASFETA wa Wilaya au Mkoa uongozi huo uweze kuwasiliana na mkuu wa shule au chuo husika.

Baada ya uongozi wa Wilaya au Mkoa kukamilisha taratibu zote itakazopewa na shule au chuo husika ndipo shughuli za kuanzishwa tawi zinaweza kuendelea katika ngazi ya wanafunzi wenyewe.

Mafanikio ya CASFETA yanatokana na ushirikiano kati ya wanafunzi katika shule au chuo na makanisa ya kipentekoste yaliyo jirani CASFETA itaweza kukua na kuendelea katika utumishi kwa wanafunzi, walimu, washirika na wachungaji wa makanisa ya kipentekoste kuwa na juhudi ya kazi ya Mungu mashuleni.

MAKUSUDI/MADHUMUNI YA USHIRIKA HUU.

1. Kuwawezesha wanafunzi kumwabudu Mungu kulingana na imani yao ya kipentekoste.
2. Kuwaunganisha wanafunzi wote wenye imani ya kipentekoste nchini Tanzania waliookoka (watakaookoka)
3. Kuwahamasisha wanafunzi wawe na moyo wa kusaidiana kiroho, kimasomo na kijamii
4. Kuwahamasisha wanafunzi wa kipentekoste wajue wajibu wao katika kumtumikia Mungu.
5. Kuwafundisha wanafunzi maadili ya kikristo kupiga vita matendo yote yanayoharibu jamii kama vile zinaa na (magonjwa yake kama vile UKIMWI) Utoaji wa mimba, Ulevi, Utumiaji wa madawa ya kulevya, Ubakaji, pamoja na matendo mengine maovu.
6. Kuwahimiza wanafunzi wawe na bidii katika masomo yao.
7. Kuwasaidia wanaushirika wa CASFETA kielimu kila inapowezekana.
8. Kujenga tabia miongoni mwa wanafunzi ya kulipenda na kulitumikia Taifa lao la Tanzania kwa uadilifu.

JINA LA UMOJA HUU NI; “THE CHRIST’S AMBASSADOR STUDENT FELLOWSHIP TANZANIA” kwa kifupi ‘CASFETA’

LUGHA

Lugha ya mawasiliano katika umoja huu ni Kiswahili au kiingereza.

AINA YA USHIRIKA

CASFETA ni ushirika wa wanafunzi wa aina ya kipentekoste ambao umedhaminiwa na kanisa la Tanzania Assemblies of God (T.A.G)

Reg.S06246.1981.

CASFETA inaendesha shughuli zake katika mfumo wa kipentekoste.

NEMBO

1). Nembo ya ushirika huu ni msalaba, Biblia na kofia na shahada/stahada kama inavyoonekana katika jalada la mwongozo.

2). Andiko la msingi la ushirika huu ni methali 1:7 ambalo linasema “kumcha Bwana ni chanzo cha maarifa bali wapumbavu hudharau hekima na adabu”

Rangi ya ushirika itakuwa ni nyekundu na nyeupe

A).Nyekundu - Damu ya Yesu itutakasayo.

B). Nyeupe – Maisha safi ya utakatifu.